چوارشەممە، ٤ی سێپتەمبەری ٢٠٢٤، ڤیژن ئێجوکەیشن خەڵاتی ڕێزلێنانی لەلایەن بەڕێز مەسرور بارزانی سەرۆکی حکومەتی هەرێمی کوردستانەوە پێ بەخشرا لەپای ئەو کار و پڕۆژانەی دامەزراوەکە کە لە سێکتەری پەروەردە و خوێندنی باڵای هەرێمی کوردستان پێشکەشی کردون.
لە ڕێورەسمەکەدا، کە لەلایەن حکومەتی هەرێمی کوردستانەوە لە هەولێر ڕێکخرابوو، خەڵاتی ڕێزلێنان بەخشرا بە چەند دامەزراوە و کۆمپانیای ناوخۆیی کە لە ماوەی ڕابردوودا لە ڕێگەی پڕۆژە گرنگ و ستراتیجی و چاکەخوازەکانیانەوە خزمەتیان بە کوردستان گەیاندوە.
بەڕێز مەسرور بارزانی، سەرۆکی حکومەتی هەرێمی کوردستان، کە خەڵاتەکەی بەخشییە خاتوو زەینەب خەلیل، جێگری بەڕێوەبەری ڕێپێدراوی ڤیژن ئێجوکەیشن، لە وتارەکەیەدا سوپاس و پێزانینی ئاڕاستەی ئەو دامەزراوە و کۆمپانیایانە کرد کە نیشتیمان پەروەرانە هاوکار و یارمەتیدەر بوونە لە بەجێگەیاندنی پڕۆژە و کاری گرنگ بۆ ئاوەدانکردنەوەی هەرێمی کوردستان سەرەرای قەیران و ئالەنگارییەکان.
ڤیژن ئێجوکەیشن کە لە سەرەتایی دامەزراندنییەوە دیدگایەکی ڕوونی بۆ خزمەتکردنی کوردستان هەبووە بەبێ جیاوازی، توانیوەیەتی بە کار و پڕۆژەی جیاوازەکانی لە سێکتەری پەروەردە و خوێندنی باڵای هەرێمی کوردستان ڕۆڵی بەرچاو بگێڕێت.
دوای وەرگرتنی خەڵاتەکە، خاتوو زەینەب خەلیل، جێگری بەرێوەبەری ڕێپێدراوی ڤیژن ئێجوکەیشن، ڕاگەیاند “ئەم خەڵاتە جێگای شانازییە بۆ ڤیژن ئێجوکەیشن کە بەرهەمی تیمێکی ماندوونەناسان و سەرکردایەتییەکی کاریگەرە.”
ڤیژن ئێجوکەیشن لە ساڵی ٢٠١٨ دامەزراوە و خاوەندارییەتی چەندین دامەزراوەی تایبەت دەکات لە هەرێمی کوردستان، و تەواوی ئەو داهاتەی لە دامەزراوەکانییەوە دەستی دەکەوێت لە هەردوو سێکتەری پەروەردە و خوێندنی باڵا تەرخانیدەکاتەوە. تاکو ئێستا، ڤیژن ئێجوکەیشن زیاتر لە ٣٠ قوتابخانەی حکومی لە هەرێمی کوردستان نۆژنکردۆتەوە، ٣ قوتابخانەشی لە بناغەوە بنیاتناوە و پێداویستی نزیکەی ٦٥٠ قوتابخانەشی پڕکردۆتەوە، وە ساڵانە زیاتر لە ٦٠٠ زەماڵەی خوێندن (سکۆلەرشیپ) دەبەخشێتە قوتابیانی ئاست بەرز و شایستەی کوردستان .