بە پاڵپشتی سەرەکی ڤیژن ئێجوکەیشن، لە بەرواری ١ی ٦ی ٢٠٢٤، یەکەمین کۆنفڕانسی نێودەوڵەتی ژیری دەستکرد لە عێراق لە هەولێر بەڕێوەچوو. ئامانجی کۆنفڕانسەکە ناساندن و ئاشناکردنی ژیری دەستکرد بوو بە کۆمەڵگای هەرێمی کوردستان و عێراق، کە شۆڕشێکی سەردەمیانەی تەکنەلۆژییایە لە بەدیهێنانی گۆڕانکاری و کاریگەریخستنە سەر پێشکەوتنەکانی مرۆڤایەتی و زانست و زانیاری لە جیهاندا.
زیاتر لە ١٥ پرۆفیسۆری بواری تەکنەلۆژیا و ژیری دەستکرد لە ناوخۆ و دەرەوەی کوردستان بانگێشتی کۆنفڕانسەکە کرابوون و گەنگەشەیەکی فراوانی پێگە و کاریگەرییەکانی ژیری دەستکردیان کرد لەسەر مرۆڤایەتی و سێکتەرە جیاوازەکانی کۆمەڵگا.
لە میانەی کۆنفڕانسەکدا، ژمارەیەک پانێڵ و وۆرکشۆپی تایبەت بەڕێوەچوو کە تیایاندا تیشک خرایە سەر ڕۆڵی ژیری دەستکرد لە بوارەکانی پەروەردە، کۆمپیوتەر، پرۆسەی زمانی سروشتی، ئاسایشی سایبەری، یاسا و ڕێنماییەکان، هەروەها ڕۆڵی دیاری ئەم تەکنەلۆژیایە لەسەر کەرتی ئابووری و تەندروستی.
ئەم کۆنفڕانسە، کە بە پاڵپشتی ڤیژن ئێجوکەیشن ڕێکخرابوو، لەلایەن زانستخوازان و پسپۆڕانەوە وەکو هەنگاوێکی سەرەتایی و پێویست دەبینرێت بۆ ئاشناکردن و دانەبڕانی کۆمەڵگای کوردستان و عێراق لە پێشکەوتنە هەنوکەییەکانی تەکنەلۆژیا و ژیری دەستکرد، وە بۆ بەیەکگەیاندن و دروستکردنی پەیوەندی لەنێوان زانایان و پسپۆڕانی ناوخۆی و بیانی لە بواری تەکنەلۆژیا.
ژیری دەستکرد بە دیاردەیەکی تەکنەلۆژیی نوێ لە قەڵەم دەدرێت. لە ماوەی ڕابردوودا ئەم داهێنانە تەکنەلۆژییە بووتە مایەی تێڕامانی دانیشتووانی جیهان و سەرجەم چاوەکانی بەلای خۆیدا ڕاکێشاوە، و کاریگەری بەرچاوی لە سێکتەرە جیاجیاکان تۆمارکردوە. هەر بۆیەش لێکەوتە بەردەوام و خێراکانی بووەتە جێگای مشتومڕی زانایان و شارەزایانی بواری تەکنەلۆژیا کە وایدەبینن داهاتوو بۆ ژیری دەستکرد دەبێت و دەرئەنجام و کاریگەریەکانیشی لە ساڵانی داهاتوودا بەرفراوانتر دەبێت.